Mashirikisho, vyama watakiwa kutoa mikakati ya Timu za Taifa kufikia Desemba 31

0

Na Mwandishi Wetu 

Katibu Mkuu Wizara ya Habari, Utamaduni, Sanaa na Michezo, Dk. Hassan Abbasi, ameyaagiza mashirikisho na vyama mbalimbali vya michezo nchini ambavyo vinasimamia Timu za Taifa kuwasilisha ratiba na mikakati ya timu hizo kwa mwaka 2021 kufikia mwishoni mwa mwezi huu.

Dk. Abbasi ameyasema hayo leo Jumatatu Disemba 7, 2020 jijini Dar es Salaam alipokuwa akifungua na kisha kutoa mada kwenye semina ya maafisa habari na wasemaji wa vyama, mashirikisho na vilabu mbalimbali vya michezo kuhusu namna ya kusemea na kutangaza masuala ya michezo iliyoandaliwa na Chuo cha Maendeleo ya Michezo Malya Kampasi ya Dar es Salaam.

“Tumebaini moja ya sababu inayokwamisha Timu zetu za Taifa kufanya vizuri Kimataifa ni pamoja na baadhi ya Vyama na Mashirikisho yanayosimamia timu hizo kwa niaba ya wananchi kuzichukulia timu hizo kama timu zao binafsi na hivyo wanaposhindwa kufanya maandalizi ya maana tunaanguka kama Taifa.

“Hii sasa basi, nataka kufikia Disemba 31 mwaka huu mipango na ratiba zote za Timu za Taifa ziwe zimewasilishwa kwenye Baraza la Michezo la Taifa nao wataileta Serikalini ili tujue mwaka 2021 tunaanzaje,” amesema.

LEAVE A REPLY

Please enter your comment!
Please enter your name here